FUTBOL YANGILIKLARI

Аргентина терма жамоасида Мессининг вориси: 10-рақам учун икки номзод маълум бўлди Лионель Месси терма жамоадаги фаолиятини якунлади. Бироқ ҳозиргача унинг ўрнини ким эгаллаши ва миллий жамоадаги 10-рақамли футболка кимга насиб этиши номаълумлигича қолмоқда. The Touchline нашрининг Аргентинадаги ESPN бўлими маълумотларига таяниб хабар беришича, «альбиселесте» мураббийлар штаби Мессидан кейин 10-рақамни олиши мумкин бўлган икки нафар номзодни кўриб чиқмоқда. Манбага кўра, улар Нико Пас ва Лаутаро Мартинес ҳисобланади. Ноябрь ойида Аргентина терма жамоаси Уругвай ва Коста-Рикага қарши ўртоқлик учрашувларини ўтказади. Лионель Месси «альбиселесте» сафидаги хайрлашув учрашувини октябрь ойида ўтказган эди. Эслатиб ўтамиз, ёзда Аргентина терма жамоаси жаҳон чемпионати финалида Испанияга мағлуб бўлган эди.

МЮ ва "Ливерпуль" 40 миллион евролик дарвозабонга кўз тиккан "Брайтон" сафида ҳаракат қилаётган нидерландиялик дарвозабон Барт Вербрюгген трансфер бозорида талабга эга. 24 ёшли дарвозабоннинг ўйинларини Англия Премьер-лигасининг бир нечта йирик клублари кузатиб бормоқда. Гап "Ливерпуль”, "Манчестер Юнайтед" ва "Челси" ҳақида кетмоқда. Нидерландиялик кўплаб етакчи клубларнинг узоқ муддатли режаларида муҳим вариант сифатида кўрилмоқда. Вербрюгген 2023 йилнинг июлидан бери "Брайтон" сафида ўйнамоқда. Футболчининг амалдаги меҳнат шартномаси 2028 йил июнь ойи охиригача мўлжалланган. Transfermarkt унинг бозор қийматини 40 миллион еврога баҳоламоқда.

Месси, Ҳоланд ва бошқалар. FIFPRO 2026 йилнинг энг яхши футболчиларидан иборат рамзий жамоани эълон қилди Кутилмаганда 2026 йилги «Олтин тўп» эгаси Ҳарри Кейн жой олмади. Халқаро профессионал футболчилар федерацияси (FIFPRO) 2026 йил якунлари бўйича йилнинг энг яхши футболчиларидан иборат рамзий жамоани эълон қилди. Кутилмаганда 2026 йилги «Олтин тўп» эгаси Ҳарри Кейн жой олмади. Шунингдек, Криштиану Роналду ҳам рамзий жамоага киритилмади. Рамзий жамоадан қуйидаги футболчилар жой олди: Дарвозабон: Давид Райя («Арсенал») Ҳимоячилар: Ашраф Ҳакими («ПСЖ»), Пау Кубарси («Барселона»), Нуну Мендеш («ПСЖ») Яримҳимоячилар: Витиня («ПСЖ»), Родри («Барселона»), Жуд Беллингҳэм («Реал»), Ламин Ямал («Барселона»). Ҳужумчилар: Эрлинг Ҳоланд («Манчестер Сити»), Килиан Мбаппе («Реал»), Лионел Месси («Интер Майами»).

Почеттино «МЮ» бош мураббийлиги учун асосий номзодга айланди — манба Кэррикнинг келажаги яқин вақт ичида ҳал қилиниши кутилмоқда. «Манчестер Юнайтед» раҳбарияти бош мураббий Майкл Кэррикни лавозимидан озод этиш имкониятини жиддий кўриб чиқмоқда. Бу ҳақда журналист Бен Жейкобс хабар берди. Маълум қилинишича, клуб директорлар кенгаши ҳали якуний қарорга келмаган. Бироқ мураббийнинг келажаги яқин вақт ичида ҳал қилиниши кутилмоқда. Кэррикнинг ўрнига асосий номзодлардан бири АҚШ миллий жамоаси устози Маурисио Почеттино ҳисобланади. Аргентиналик мутахассиснинг шартномасида товон пули тўлаш орқали келишувни бекор қилиш банди мавжуд. Қайд этиш лозим, манчестерликлар ушбу мавсумда қониқарсиз иштирок этмоқда. Жамоа АПЛнинг дастлабки 10 турида бир марта ғалаба қозонди, беш бор дуранг ўйнади ва тўрт марта мағлуб бўлди. Айни вақтда «Манчестер Юнайтед» 8 очко билан 18-ўринда бормоқда ва қуйи лигага тушиб кетиш хавфи мавжуд ҳудуддан жой олган. Аввалроқ Дешам «қизил иблислар»нинг таклифини рад этгани маълум қилинганди.

Кубарси: «Менга овоз берган барча инсонларга миннатдорчилик билдираман» «Барса» ҳимоячиси Golden Boy мукофотини қўлга киритганидан сўнг ўз таассуротлари билан ўртоқлашди. «Барселона» ва Испания миллий жамоаси ҳимоячиси Пау Кубарси Европанинг энг яхши ёш футболчисига топшириладиган Golden Boy мукофотини қўлга киритди. 19 ёшли футболчи овоз бериш натижалари эълон қилингач, ўз таассуротлари билан ўртоқлашди. «Ушбу мукофотни қўлга киритганимдан жуда фахрланаман. Менга овоз берган барча инсонларга миннатдорчилик билдираман», — деди Кубарси Tuttosport нашри намойиш этган видеомурожаатда. Қайд этиш лозим, испаниялик ҳимоячи ўтган мавсумда «Барселона» билан мамлакат чемпионлиги ва Суперкубогини қўлга киритди. Шунингдек, у Испания миллий жамоаси сафида 2026 йилги жаҳон чемпионати ғолибига айланди. Кубарси бу мавсумда Ла Лигада 9 та ўйин ўтказиб, 2 та голли узатма берди. Бундан ташқари, у Чемпионлар Лигасининг 4 та учрашувида майдонга тушди. Аввалроқ Пау дунёнинг энг қиммат ҳимоячисига айлангани маълум қилинганди.

✅ Кун ўйинлари / 8 ноябр 🇺🇿 Суперлига. 27-тур 16:00. Нефтчи — ОКМК 16:00. Бухоро — Насаф 18:15. Пахтакор — Қўқон-1912 🏴󠁧󠁢󠁥󠁮󠁧󠁿 АПЛ. 10-тур 19:00. Кристал Пэлас — Ливерпул 19:00. Сандерленд — Челси 19:00. Брайтон — Брентфорд 19:00. Ипсвич — Борнмут 21:30. МЮ — Астон Вилла 🇪🇸 Ла Лига. 12-тур 18:00. Элче — Бетис 20:15. Реал Сосиедад — Райо Валекано 22:30. Вилярреал — Хетафе 22:30. Селта — Леванте 01:00. Атлетико — Барселона / Zo'r TV 🇮🇹 А Серия. 11-тур 16:30. Наполи — Лацио 19:00. Женоа — Милан 19:00. Монца — Аталанта 22:00. Интер — Комо 00:45. Фиорентина — Ювентус 🇩🇪 Бундеслига. 9-тур 19:30. Кёлн — Байер 21:30. Фрайбург — Юнион Берлин 23:30. Ҳоффенхайм — Шалке 🇫🇷 Лига 1. 10-тур 19:00. Ренн — Лилл 21:15. Брест — Лион 21:15. Ле Манс — Монако 00:45. Ланс — Марсел 🇨🇭 Швейцария Суперлигаси. 13-тур 18:00. Сент-Галлен — Лугано 🇷🇺 РПЛ. 14-тур 22:45. Балтика — Динамо

Ҳарри Кейн "Бавария" билан шартномасини 2029 йилгача узайтирди "Бавария" ҳужумчи Ҳарри Кейн билан битим узайтирилганини расман эълон қилди. Янги келишув 2029 йил 30 июнгача амал қилади. 33 ёшли англиялик футболчи 2023 йилнинг ёзидан буён мюнхенликлар шарафини ҳимоя қилиб келмоқда. Бу вақт ичида у 161 та расмий учрашув ўтказиб, 156 та гол уришга эришди. Кейн Мюнхенда ўзини ўз уйидагидек ҳис қилаётганини тан олди ва жамоа билан бирга янада кўпроқ совринларни қўлга киритиш истагини билдирди. "Мен ушбу клубни, унинг мухлисларини ва Мюнхен шаҳрини яхши кўраман. Бизда фантастик жамоа бор, Венсан Компани эса ажойиб мураббий. Бутун оилам бу ерда жуда бахтли. Қолишни истагандим ва келажакни сабрсизлик билан кутяпман", – деди ҳужумчи.

Ла Лига. "Реал" меҳмонда "Валенсия"ни йирик ҳисобда мағлуб этди Ла Лига 12-тур доирасидаги "Валенсия" — "Реал" ўйини бўлиб ўтди. Ўйиннинг 28-дақиқасида Федерико Вальверде ҳисобни очди. Арда Гюлер 36-дақиқада устунликни яна биттага оширди. Килиан Мбаппе 75-дақиқасида айнан Арда Гюлернинг узатмасини голга айлантирди ва ўйинга нуқта қўйди. Мезбонлар ҳимоячиси Хосе Гайя 79-дақиқада майдондан четлатилди. “Реал” Ла Лигада 12 та ўйиндан сўнг 30 очко билан иккинчи ўринга кўтарилиб олди. Эртага 11 тадан ўйин ўтказган “Атлетико” (28 очко) ва “Барселона” (30 очко) ўзаро тўқнаш келади. 8 ноя 2026, 01:00 Valencia — Real Madrid 0 – 3 тугади

Суперлига. "Навбаҳор"нинг мағлубиятсиз серияси 15 та ўйинга етди "Лочинлар" кеча Суперлиганинг 27-турида Навоийда "Қизилқум" меҳмони бўлди. Муросасиз ўтган беллашувда омад “Навбаҳор”га кулиб боқди (1:0). Шу тариқа Наманган жамоасининг Суперлигадаги мағлубиятсиз серияси 15 та ўйинга етди. Тимур Кападзе шогирдлари охирги маротаба чемпионатнинг 12-турида ОКМКга имкониятни бой берган эди (2:3). Маълумот учун, “Навбаҳор” навбатдаги тўқнашувини 20 ноябрь куни Наманганда “Нефтчи”га қарши ўтказади.

Фабио Каннаваро Ўзбекистон миллий терма жамоасини тарк этиши мумкин Ўзбекистон миллий терма жамоаси бош мураббийи Фабио Каннаваро ўз лавозимини тарк этиш имкониятини кўриб чиқмоқда. Бу ҳақда таниқли инсайдер Фабрицио Романо хабар берди. Хабарларга кўра, италиялик мутахассиснинг бундай қарорга келишига Осиё футбол конфедерацияси томонидан 2027 йилги Осиё кубоги муддатининг ўзгартирилиши сабаб бўлиши мумкин. ОФК 3 ноябрь куни Саудия Арабистонида ўтказиладиган қитъа чемпионати бошқа муддатга кўчирилганини расман эълон қилди. Дастлаб мусобақа 2027 йилнинг 7 январидан 5 февралига қадар бўлиб ўтиши режалаштирилганди. Янги тақвимга кўра, Осиё кубоги 2027 йил 23 декабрдан 2028 йил 21 январга қадар ўтказилади. Янги саналар ФИФА томонидан тасдиқланиши керак. Ушбу ўзгариш Каннаваронинг Ўзбекистон миллий терма жамоасидаги келажагига ҳам таъсир кўрсатиши мумкин. Чунки мутахассиснинг амалдаги шартномаси 2027 йил октябрь ойига қадар мўлжалланган, Осиё кубоги эса энди мазкур муддатдан кейин бўлиб ўтади. Шу сабабли италиялик мураббий терма жамоадаги фаолиятини давом эттириш ёки лавозимини тарк этиш масаласини кўриб чиқиши мумкинлиги айтилмоқда. Ҳозирча Каннаваронинг истеъфога чиқиш ҳақида якуний қарор қабул қилгани тўғрисида расмий маълумот йўқ. Ўзбекистон футбол ассоциацияси ҳам бу борада муносабат билдирмаган. Эслатиб ўтамиз, Фабио Каннаваро 2025 йил октябрь ойида Ўзбекистон миллий терма жамоаси бош мураббийи этиб тайинланган. У 2026 йилги жаҳон чемпионатида миллий жамоани бошқарган.